(Madda Oduu ABO/MOA/Amajjii 3,2010) Haala ulfaataa diinni hordofaa jirtu keessatti fi walitti qabamanii waliin kabajuu halaan rakkisaa ta’e keessatti barattooti Oromoo Yuniversity Haramayaa guyyaa WBO kabajachuun hubatame. Guyyaa WBO fi bara haara kana bakka jiran maratti wal yaadachiisa fi dhaamsa walii daddabarsaa fi wal jajjabeessuun ayyaana kana kabajachuun maddeen dhaaman.
Wayyaanotis akka ijoolleen Oromoo guyyaa kanatti addatti kabajatan waan beekaniif jecha basaasota isaanii itti bobbaasuun hubatamee jira, wayyaaneen barattoota Oromoo fi saboota cunqurfamoo to'achuudhaaf jecha blokii hunda irratti basaasota ramadamanii barataa fakkaatanii basaasaa turuun isaaniis hubatameera. Kanaaf haala akkasii keessatti barattooti Oromoo Yniversity Haramayaa toftaan guyyaa kana yaadatanii oolanii jiru.
Oduu wal qabataan Yuuniivarsiitii kana keessatti mudde guyyaa 23 fi 24 akka lakkofsaa itoophiyaatii dhiibbaa mootummaa irraa kana ka'e barattoonii moora yuuniivarsiiti kanaa akka guyyaa sabaa fi sablammii akka kabajan godhamanii turan. Guyyaan kun guyyaa fakkeessaa sabooti akka mirga isaanii hin gaafatneef itti danqarame ta’uun otoo beekamuu mirgi sabaa fi sablammootaa kabajamee jira jedhanii guyyaa kana haa yaadannu jedhanii dhama’aa turan. Haaluma kanaan OPDOn ijoollee Oromoo Godinaan(lagaan) qooduudhaan kaayyoo uummata lagaan qoodani bituu ishee calaqisiifteetti. Ijoolle kana rawwatan garuu dirqama diinni itti kenne raawwachuuf bakkaan gahuuf akka ta’e hubatamee jira.
Yoo OPDO ta'an malee hojiin hin argamu jechuudhaan barattoota doorsisuun yakka daangaa hin qabne (kan uummata oromoo adda qoodun) rawwataan. Waanti dagatamuu hin qabne garuu uummanni Oromoo gaaffii sabaa akka sabaatti kaasee sochii isaa itti fufuu akka hin dhaabne dha. Kanaaf Oromoon saba waan ta’eef "saba Oromoo" jedhamee waamamuu qaba malee sab-lammii Oromoo jedhamuu hin qabu. Waanti OPDOn dalagde Oromoo akka gosaatti qoqqooduu dha, Oromoon kan inni ittiin wal waamu gosaan otoo hin taane akka saba Oromoo jedhamuu fi warri OPDO maqaa kanaan daldalachaa jiranii Oromoo gosaa fi sablammiitti gad buusanii ilaaluun kan seenaan isaan gaafachiisuu dha. Akeeki Oromoo lagan waamuun fi adda qooduun toftaa qoqqodanii bituu warra habashaa waan ta’eef ilmaan Oromoo akka tokkummaa isaanii akka sabaatti qaban tikfatanii haraka wal qabatan dhaamsa keenya.
Warri ilmaan Oromoo maqaa lagaa fi lafaan waamanii adda qooduu qabaniif deebbiin ilmaan Oromoo lagdi maqaa lafaati malee maqaa Oromoo bakka bu’u miti, Oromoon hardha sadarkaa sabaa irra waan jiruuf kana sharafuuf yaaluun gowwummaa dha jedhanii akeeka diinaa fashalsuun ilmaan Oromoo mara irraa eegama. Bara habasooti jabina keenya beekanitti maqaa Oromoo waamuu sodaachuun dabtarichi Abbaa Bahiree Oromoo jechuu sodaatee maqaa itti nu waamaa ture yaadachuun gahaa dha. Amma bifa sanaan isaaniif milkaahuu dadhabnaan Oromummaa Oromoo laaffisuuf jecha takkaa maqaa gosaan yeroo biraa ammoo maqaa lafaa fi lagaan ilmaan Oromoo qooduuf tattaafatu. Ilmi Oromoo kamuu dhimma kana sirnaan xiinxaluu qaba, maqaa Harargee, Wallagga, Shawaa, Borana, Arsii fi kkf jedhanii wal waamuun, magaalaa fi baadiyyaan wal qooduun ilmaan Oromoof akka bu’aa homaatuu hin qabnee fi toftaa diinni humna Oromoo itti cabsuuf qiyyaafate ta’uu wal hubachiisuu itti fufna.
Kana immoo ijoolleen Oromoo as Yuunivesiitii haramayaa keessa jiran Guyyaa ayyaana kana dhirqamaan haa kabajani malee halkan walitti deebi'uudhaan tokkummaan oromoo yoomu cabuu akka hin dandeenye sirbaan ibsaniiru. Guyya waliin kabajaa olanii halkan immoo kabajichi akka "sirba dirqii" sirbaani ibsaniiru. Yuuniversiiti kana keessatti bakka Oditiirem jedhuamutti walitti qabamuudhaan sirba weellisaa beekamaa oromoo Eebbisaa Addunyaa "akka Taaddasaafa yoo jagnooman Halagaan Hin gabrooman" jechuudhan jibbinsaa gabroonfataaf qaban fi hawwii bilsummaaf qaban ibsaniiru. Gaafa sirba kana sirban Oromoonnii golee Oromiyaa hundaa irra walltti figuudhaan waliiti makamanii sirbaan aarii isaanii bahaniiru. Poolisiin moora adda bittimsuuf yoo jidduu senu ar'uudhaan of keessa baasanii hamma garaasaanitti sirbuun tokkummaa isaanii muldhisanii akeeka diinaa fashalsaniiru!
Injifannoo Ummata Oromoof!
